حسین امیر عبداللہیان نے شہید جنرل قاسم سلیمانی اور ابو مہدی المہندس کی رفقہاء سمیت ٹارگٹ کلنگ پر ہونے والی قانونی کارروائی کے حوالے سے میڈیا کو بتایا کہ شہید کمانڈرز کی ٹارگٹ کلنگ میں ملوث تمام ملزمان کی گرفتاری کا حکم نامہ عنقریب ہی حاصل کر لیا جائے گا۔ انہوں نے کہا کہ اس حوالے سے 6 ممالک کو جوڈیشل نمائندگی دی جا چکی ہے اور ہونے والی قانونی کارروائی کی سنجیدگی کے ساتھ نگرانی کی جا رہی ہے۔ چیئرمین سینیٹ کے مشیر امور خارجہ نے انکشاف کیا کہ شہید جنرل قاسم سلیمانی کی ٹارگٹ کلنگ کے حوالے سے امریکی ملزمان کی تعداد 45 سے بڑھ کر 48 تک پہنچ گئی ہے۔ انہوں نے تاکید کرتے ہوئے کہا کہ گو کہ شہید سلیمانی کے قاتلوں اور دہشتگرد امریکی حکومت کے چہرے پر زوردار طمانچہ رسید کیا گیا ہے، تاہم “سخت انتقام” ایرانی نظامِ حکومت کے ایجنڈے میں شامل ہے۔
انہوں نے تاکید کرتے ہوئے کہا کہ باوجود اس کے کہ سائبراسپیس پر شہید قاسم سلیمانی کی تصاویر اور نام پر پابندی عائد کی گئی ہے، شہید کے حوالے سے انٹرنیٹ اور سوشل میڈیا پر وسیع سرگرمیاں انجام دی جا رہی ہیں۔